Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. O2v]

Sonnet of Klinck-dicht.

COmt vvack're Sang-Goddin helpt lieffelijc nu queelen
Den Lof van 't Vaderlandt, dat 't langh voorspoedigh blijft,
'T welc hier so menich Geest met soete Vaersen schrijft,
En op verscheyden thoon om 't braefst' u comt bedeelen,
Iuycht nu, vermaect den lust, met held're soete keelen
Tot Godes Eer, en 'sLants wel-varen, vreught bedrijft,
Ghy Batavieren inde Eendrachts-bant verstijft,
Tvvelc noch als voormaels moet ons meeste voorspoet teelen,
Band uyt de nyd'ge Twist, soect Rust en Lust gemeen,
Helpt 't neus-wijs eyghen-waen onder de voeten treen,
Dat Liefde, Vrede steets mach meer en meer vermeeren
Bemint de waerheyts glans, hout een in't hert, u heyl,
Op Godt betrout, haet trots, bedect u Naestens feyl,
Als ghy vvild u gheschied, en denct Wie faelt mach keeren.

G.G. Wie faelt mach keeren.