Battaefsche vrienden-spieghel

[fol. K4v]

Mey-Liedt.

Op de Uoyse:
t'Weeldighe Haesgen datter streeft, &c.

REyt nu Bataefsche Maegden soet,
Amstelsche schoone gaerden,
Waer oyt s'harts lusten paerden,
Hollants Heliconinnen vroet,
Ziet u gheschoncken waerden
Maya tijdt openbaerden
Met schreum in u gunst,
Neemt de wil aen veur Cunst,
T'spieghel-boeck veur ghemelt
Tuycht van Liefdens ghewelt,
Vrienden dienst vertelt,
Delio ghy Helt,
Zijt roem der Aerden.

Cunst-locsters neemt der lusten stout

Vry by u lieve sinnen,
En al die Waerheyt Minnen,
Treet in't ontloken groene Wout
Deuchd'rijcke Dianinnen,
s'Harts waere frisheyt winnen,
Meer claerheyt deurvoelt,
En vernoecht s'hettens swoelt,
Lief aemtochtighe lust,
Tot wel waerdigher rust,
Blye Lent en kust,
T'soetste wert gheblust,
By d'Bosch Goddinnen.

Ziet ons ghecruyfde Flora uyt,

Met dees Hamadriaden,
Poesele Nymphiens baden,
T'gunt u Tytons morghen bruyt,
Voorbaenster Phoebi raden,
Lusts ijver deckt veel schaden,
Crioelt volle vreucht
Acht de tijdt als ghy meucht,
Daer noyt Mome by let,
Liefdes g'noeghend' beset
Aenghenaeme Wet,
Wacht u Venus net,
T'soet sou verladen.

t'Rijc t'geen heylsamich eeren mach

Wensch ick u Battavieren,
t'Hoogh van groen Lauwerieren,
Daerment in Liefde bloeyen sach,
Op groene Eglentieren,
t'Vlugh-Choorigh tierelieren
Stijght heen nae t'ghestart,
Loff Maya soo vart,
Die treckt yeder tree,
Tot wel saligher vree,
Titer midts zijn Vee,
Neurt soo rustigh mee,
Lieffd kant bestieren.

Prince.

Hier mee Princesgens niet soo wreet,

Als wel d'Italie Vrouwe,
Lost die vergheven souwe,
T'bloey-lootken u in als bereet,
Heeft Redens-lust doen bouwen,
T'best wil voor eyghen houwen,
Van twee quaden kiest // eer ghy nutter verliest
Hier meed' int gheley // van u gunst-grase Wey,
Stel ick dat de Mey // u aen Hebes Rey,
Als sal vertrouwen.

FINIS.

Bemindt de Waerheyt.