|
| |
Een nieu gheestelijck Liedeken, op de wijse. Gheeft my te drincken naer mijnen dorst.
Aenhoort mijn lief mijn vriendinne reyn,
Ick ben v Bruydegom sonder falen,
Wt mijn schoon rijcke dat Hemels pleyn,
Quam ick van boven hier neder dalen,
Om te genesen alle v qualen,
Com ick v soecken mijn liefste graen,
Om met mijn liefde v te doorstralen,
Coem ick v vriendelijck spreken aen.
| |
| |
Wie zijdt ghy Bruydegom delicaet.
Die my begheert dus tot v te trecken,
Ick ben een Dochter van cleynen staet,
Seer onbequaem besmet met vlecken,
V soete woorden my wel verwecken,
Maer siedt ick schaem my voor v aenschijn,
Woudt ghy vercieren mijn naecktheyt decken,
Ick sou soo geern v dienstmaecht zijn.
Ick ben een Coninck ghebenedyt,
Een Heere van Hemel en van aerden,
Hoe ghy cleynder in v seluen sijdt,
Hoe ick veel lieuer v sal aenueerden,
Daerom soo laet my met v gheweerden,
Wilt met my maken een vast verbont,
Ghy sijdt mijn liefste die ick begheerden,
Blijft ghy ootmoedich in uwen gront,
Sijt ghy een Coninck soo groot vermeert,
Edel en machtich seer hooch ghepresen,
Waerom ist dat ghy dan een begheert,
Soo slechten Dochter als ick midts desen,
Ick ben niet weerdich v Bruyt te wesen,
O schoone Bruydegom groot van lof,
Laet my een van v dienstmaechden wesen,
De minste in ws Vaders hof.
Ick ben almachtich hoort my bedien,
Ick woon int hoofte weet dit certeyne,
Maer altijt heb ick seer aenghesien,
Die in haer seluen zijn slecht en cleene,
Dus weest ootmoedich van herten reene,
Met groot betrouwen soo hoopdt in my,
In mijn schoon Rijcke dat Hemels pleyne,
Sult ghy groot wesen van herten bly.
O Rijcken Coninck en gheuer mildt,
Naer v hebbe ick alsoo grooten verlanghen,
Ist dat ghy v gheweerdighen wilt,
| |
| |
My voor v dienstmaecht te ontfanghen,
Ick sal v dienen, vierich aenhanghen,
Alle mijn daghen beminnen seer,
Ick sal v prijsen met soete sanghen,
Mijn lieue Bruydegom Godt en Heer.
Ben ick v lieue Bruydegom fijn,
Soo moet ghy my dan alleen aencleuen,
Ick sal v goedt en ghetrouwe zijn,
Wilt my wt liefden v trouwe gheuen,
Siet mijnen name sal zijn gheschreuen,
In v voorhoofdt schoon en suyuerlijck,
Met vreuchden sult ghy altoos leuen,
Hier bouen in mijns Vaders rijck.
Hoort soete Bruydegom myn beduyt,
Ist dat v hoocheyt hem wilt verneren,
My te ontfanghen voor v Bruydt,
Ick wil seer gheerne v accepteren,
Altoos te leuen naer uwen raedt,
V goedtheyt mach ick seer wel lauderen,
Dat ghy my brenght tot soo grooten staet.
Siet ick begheer te woonen gherust,
In die reyn suyuere herten teere,
Nae die oodmoedighe heb ick lust,
Om haer te brenghen tot grooter eere,
Dus wilt my dienen beminnen seere,
Weest altoos danckbaer mijn liefste soet,
Soo sal ick v noch beschencken meere,
Met veel schoone giften en gauen goedt.
O Princelijcke Bruydegom fier,
V sal ick dancken tot allen tijden,
Voor alle menschen ter werelt hier,
Sal ick v groote goetheyt belijden,
Wilt my beschermen aen allen sijden,
Gheeft my te leuen naer v gherief,
V sal ick louen ghebenedijden,
| |
| |
Ghy zijt alleen mijn liefste lief.
Comt mijn vriendinne wilt met my gaen,
In mijnen boomgaert seer schoon van binnen,
Eet van die vruchten die daer in staen,
Soo sult ghy my noch meer beminnen,
V siel en lichaem v hert en sinnen,
Sullen verheughen van dese spijs,
Een schoone croone sult ghy oock winnen,
In mijn schoon hemels Paradijs.
|
|
Auteursrechtvrij