Een nieu devoot geestelijck lietboeck

Een nieu gheestelijck Liedeken, Op de wijse: In dulce jiubilo.

AVe Moeder vruchtbaer,
Wt v soo is voorwaer,
Een suyuer vrucht ghecomen,
Christus ons middelaer,
Van v heeft hy ghenomen,
Sijn heylich lichaem claer,
Siet wy Christen schaer,
Eeren v voorwaer,
O schoone bloemder bloemen,
Bidt voor ons allegaer.

[p. 61]

 

Aue Maria fijn,

 

Sonder droefheyt oft pijn,

 

Soo is van v gheboren,

 

Christus ons Medecijn,

 

Ghy brenght den peys te voren,

 

Door v cleyn Kindekijn,

 

Van zijn claer aenschijn,

 

Vloyt der vreuchden wijn,

 

Schoon Roose sonder doren,

 

Lof moet v altoos zijn.

 

Aue schoon dagheraet,

 

Die schoon en suyuer staet,

 

Bouen die Son ghepresen,

 

Claer in des Hemels graet,

 

O Maghet wtgelesen,

 

Hoe schoon is v cieraet,

 

Door v heylich saet,

 

Is den vyant quaet,

 

Verplet zijn hooft midts desen,

 

Certeyn tot onser baet.

 

Aue Maechdelijck greyn,

 

Als een Lelie certeyn,

 

Bloyden ghy schoon van deuchden,

 

Hier in des werelts pleyn,

 

Dickmaels ghy v verheuchden,

 

In uwen Soon alleyn,

 

Edel claer Fonteyn,

 

Pure Maghet reyn,

 

Wy groeten v met vreuchden,

 

Bidt voor ons alle ghemeyn.

 

Aue See-sterre net,

 

Ghy zijt naer Jesus wet,

 

Ons weerdighe Princersse,

 

Inden Hemel gheset,

 

En oock ons voorspraeckersse,

 

Door v devoot ghebet,

 

Schoone violet,

 

Blom van Nasaret,

 

Ghy zijt ons Patronersse,

 

Wit Roosken sonder smet.