Een nieu devoot geestelijck lietboeck

Een nieu Liedeken van die gloriose Hemelvaert Marie, op de wijse, Cupido triumphant, Aenhoort mijn lamenteren,

Godts lieue Moeder reyn,
Wy mogen v wel prijsen,
Die Engelen certeyn,
V groote eer bewijsen,
Alle gheslachten vroet,
Groeten v met ootmoet,
Aue Maria maghet soet.
Wy zijn geheel verheucht,
In Godt het sal ons vromen,
Die v met groote vreucht,
Heden heeft opghenomen,
Hier wt des werelts stof,
In zijn schoon Hemels hof,
Hem sy gloria eer en lof.
Want ghy hebt wel verdient,
Door v deuchdelijck leuen,
Van Godt v liefste vrient,
Aldus te zijn verheuen,
Met ziel en lichaem schoon,

[p. 52]

 

By Jesum uwen soon,

 

Regneert ghy in des hemels throon.

 

Nae Jesus hemelvaert,

 

Soo die Leraerts verclaeren,

 

Hebt ghy Maghet vermaert,

 

Gheleeft noch vyfthien Jaeren,

 

V heylich leuen claer,

 

Is een Spiegel voorwaer,

 

Hier voor ons menschen allegaer.

 

Door v deuchden perfeckt,

 

Ghy die werelt verlichten,

 

V leuen onbevleckt,

 

Cost alle menschen stichten,

 

Als een Leli ghemeyn,

 

Onder die bloemkens reyn,

 

Waert ghy hier in des werelts pleyn.

 

Seer vriendelijcken soet,

 

Waert ghy tot allen menschen,

 

Die droeuighe van moet,

 

Troosten ghy naer haer wenschen,

 

Ghy hebt haer deucht geleert,

 

In als Godts lof vermeert,

 

Daerom wordt ghy nu dus ghe-eert.

 

Perfect waert ghy geheel,

 

Een Maecht der Maechden fleure,

 

Als balssem en caneel,

 

Soo gaeft ghy soeten geure,

 

Door u deuchden eersaem,

 

Hebt ghy dees groote faem,

 

Voor Gode zijt ghy aengenaem.

 

Ghy hebt ghevisiteert,

 

Met heylige gebeden,

 

De plaetsen genoteert,

 

Daer Jesus had geleden,

 

Daer hy verresen was,

 

En opgheclommen ras,

 

Versocht ghy dickmael op dat pas.

 

Alst Godt beliefden wel,

 

V zijn Moeder t’huys te haeln.

 

Den Engel Gabriel,

[p. 53]

 

Liet hy neder tot v dalen,

 

Die heeft tot v gheseyt,

 

Dat Jesus was bereyt,

 

V te halen met vrolijckheyt.

 

Hier in waert ghy verheucht,

 

Want ghy v seer verblijden,

 

Met grooten lof en vreucht

 

Ghy God ghebenedijden,

 

Dat hy v haelen sou,

 

Hier wt des werelts rou,

 

In die schoon Hemelsche landou,

 

Want ghy hadt seer verlangt,

 

By u uwen soon te wesen,

 

Dus hebt ghy Godt, gedanckt,

 

Met lofsanck v uytgelesen,

 

Dat nv gecomen was,

 

Die ure op dat pas,

 

By uwen soon te trecken ras.

 

Een saecke hoort mijn bedien,

 

Begeerden ghy van v soone,

 

Voor v doot eens te sien,

 

Sijn lieue Jongeren schoone,

 

Dit is alsoo gheschiet,

 

Na uwen wille siet,

 

V Soon en cost v weygeren niet.

 

Door Godts cracht zijn vergaert,

 

Die Apostelen te samen,

 

Die vrolijck onbeswaert,

 

In v slaepacamer quamen,

 

Ghy ontfingt hem met vreucht,

 

En waert geheel verheucht,

 

Ghy loofden Godt van dese deucht.

 

Doen quam v Sone daer,

 

Om v by hem te haelen,

 

Met die Hemelsche schaer,

 

Die doen met soeter talen,

 

Loofden en danckten hem,

 

Met een vrolijcke stem,

 

Den Heer van t’nieuw Jerusalem.

 

Met vreuchden onbevreest,

[p. 54]

 

En met cloecken verstande,

 

Soo gaeft ghy uwen Gheest,

 

V siel in Jesus handen,

 

Wie sou doen het gewach,

 

Wat vreucht datmen daer sach,

 

Op desen uwen sterfdach.

 

Vrolijck was den vuytganck,

 

Van v schoon Maget blije,

 

Die Engelen met lofsanck,

 

Maeckten een Melodije,

 

Sy loofden Godt den Heer,

 

Die v zijn Moeder teer,

 

Alsoo verhief met vreucht en eer.

 

Ghy bloem van Nazaret,

 

Hoe werdt ghy doen verheuen,

 

Als een Leli geset,

 

In dat schoon eeuwich leuen,

 

Aen Jesus rechter handt,

 

Is uwen stoel geplant,

 

Van weelden vloeyt ghy abundant.

 

Een croone was v bereet,

 

Die hebt ghy doen ontfangen,

 

Dat schoon vergulden cleet,

 

Is v oock omgehangen,

 

Soo Dauid had voorseyt,

 

Inden Gheest ouerleyt,

 

Ontfinckt ghy doen mee vrolijcheyt.

 

Ghy Coninginne fier,

 

Deuotelijck wy v groeten,

 

Int dal der tranen hier,

 

Ons droefheyt wilt versoeten,

 

Ghy die in Sion woont,

 

En met sterren zijt gecroont,

 

Ons Jesum uwen soone thoont

 

Van weelden zijt ghy rijck,

 

Princersse goedertieren,

 

Bidt voor ons al gelijck,

 

V Hemelvaert wy vieren,

 

Ghy die in vreuchden leeft,

 

V soone glory gheeft,

[p. 55]

 

Die v aldus verheuen heeft.