Een nieu devoot geestelijck lietboeck

Dit geestelijck Liedeken gaet op de wijse: Victimæ pascali Laudes.

Laet ons in Godt vrolijck wesen
Die als nv is verresen.
Glorioos van lichame                Agnus redemit.
Schoon blinckende bequame
Gheheel onsterfelijck
Van vreuchden rijck.
Och met wat grooter vreuchden                Agnus redemit.
Die Vroukens haer verheuchden
Doen sy hem saghen daer
Verresen claer.
Siet met vrolijckheden                Dic nobis.
Hebben sy hem aenbeden
Neder gheuallen ter eerden
Voor zijn voeten reyn met grooter weerden.
Laet ons oock met die Vrouwen                Mors & vita.
Hem louen sonder flouwen

[p. 47]

 

Die nv verresen is

 

Certeyn ghemis.

 

Hy is het Lam Godts crachtich                Mors & vita.

 

Die de schapen waerachtich

 

verlost heeft met zijn bloet

 

Wt liefden soet.

 

Lof moet hy ontfanghen                Dic nobis.

 

Die voor ons heeft ghehanghen

 

In het Cruys heeft hy verslonnen

 

Hel, duyuel, en doot gheheel verwonnen.

 

Hem sy hoocheyt en glorie                Mors & vita.

 

Die ons door zijn victorie

 

Een plaetse heeft bereyt

 

Van vrolijckheydt.

 

Door zijnen doot verheuen                Mors & vita.

 

Sullen wy eewich leuen

 

Met hem in vreuchden schoon

 

In shemels troon.

 

Hierom laet ons prijsen                Dic nobis.

 

Hem lof en eer bewijsen

 

Die leeft en regneert hier bouen

 

Met Hemelschen sanck wy hem nv louen.

 

Gloria lof en eere,                Mors & vita.

 

Sy v Godt onsen Heere,

 

Die nu verresen zijt,

 

Op desen tijt.

 

Nv inder Paesschen feesten,                Mors & vita.

 

Met die Hemelsche gheesten,

 

Singhen wy vroech en spa,

 

Alleluya.