Een nieu devoot geestelijck lietboeck

Een nieu gheestelijck Leysliedeken, op de wijse: Puer natus in betleem, oft Conditor alme fiderum.

VErblijt v nv ghy Abrahams zaet,
Die droeuich waert door Adams quaet,
Siet nv een suyver licht op gaet,
Bekeert v die in sonden staet.
Die roey van Jesse heeft ghebloeyt.
Wt haer is een schoon bloeme ghegroeyt,
Die ons met haren reuck bespoeyt,
Als een fonteyn die ouervloeyt.
Een wonder sake is openbaer,
Een maecht is Moeder nv voorwaer,
Die Godtheyt en die menscheyt claer,
Sijn nv vereenicht beyde te gaer.
Het woort dat is nv vleesch certeyn,
Gheboren van een Maghet reyn.
Hy heeft ghewoont met ons ghemeijn,
Hierom verblijt v groot en cleyn.
Een blijde maer wort ons verclaert,
Een suyuer Maghet heeft ghebaert,
Den Sone Godts van hooger aert,
Comt en aenbidt hem onueruaert.
Al is hy in een Cribbe gheleyt,

[p. 19]

 

Dat is zijn groote ootmoedicheyt,

 

Hy is soo die Schriftuere seyt,

 

Een Heer van alle heerlijckheyt.

 

Die Engelen voor zijn aenschyn staen,

 

Sy zijn hem altoos onderdaen

 

Wy die met sonden zijn belaen

 

T’is recht dat wy hem bidden aen.

 

Als nv soo comt den Herder coen

 

Die daer zijn Schaepkens sal behoen

 

Hy sal haer voen met weyde groen

 

En gheuen dat haer is van doen.

 

Tis nv den soeten gulden tijt

 

In welcken dat wy zijn verblyt

 

Met dit cleyn kint ghebenedijt,

 

Dat ons van sonden heeft beurijt.

 

Dit kint is schoon en suyuerlijck

 

Van deuchden oueruloedich rijck

 

Sijn machte streckt in alle wijck.

 

Op eerde en in Hemelrijck.

 

Hierom soo eert ons moeder wel

 

Dit soete kint met Hemels spel,

 

Laet ons oock doen na haer beuel

 

En louen hem met herten snel.

 

Gloria lof hoocheyt en cracht

 

Moet zijn dit kint van grooter macht

 

Het heeft ons salicheyt ghebracht

 

Die alsoo lange was verwacht.