Een nieu devoot geestelijck lietboeck
(1605)–Nicolaes Janssens–
Auteursrechtvrij
[pagina 17]
| |
SIon Gods wtuercoren bruyt
Wilt uwen schepper louen
Die door v is ghecomen wt
Den troone van hier bouen.
Van bouen is hy neder gedaelt
Hier in dit aertsche pleyne
Ons groote rantsoen heeft hy betaelt
Dus looft hem al ghemeyne.
Bewijst hem lof hoocheyt en cracht
Den ionghen Coninck teere.
Hy heeft ons salicheyt ghebracht
Dus gheeft hem glorie en eere.
Hy is den eenighen Sone claer
Van den Vader gheboren
Die mensche geworden is voorwaer
Van een maghet vercoren.
Ons menscheyt heeft hy aengedaen
Een knecht wert hy ghelijcke
Armoede is hy aenghegaen
Om ons te maecken rijcke.
Hy was voorwaer in weelden groot
In zijnen troon verheuen
Na der sielen waren wy doot
Hy comt ons brengen t’leuen.
En waer hy niet ghecomen siet
Wt zijnen hooghen troone
Wy waren eewich int verdriet
Dit was der sonden loone.
Maer nv is hy gecomen hier
Om ons hier af te vrijen
Al van dat eeuwich helsche vier
Dus wilt zijn eere belijen.
Die Hemelsche Geesten louen hem
Met soete lofsanghen schoone
Die nu is gheboren in Bedlehem
Die eeren sy inden troone.
Sy singen Godt inden hoochsten lof
Sy vercondighen op der eerden,
Van bouen wt dat Hemelsche Hof
Den peys van grooter weerden.
| |
[pagina 18]
| |
Den eewighen vrede wort nv vertelt
Alle goetwillige menschen
Den Vader is nv te vreden ghestelt
Wat souden wy meer moghen wenschen.
Hierom zoo laet ons danckbaer zijn
Den Coninck wtvercoren
Die van een suyuer maghet fijn
In Bedlehem is gheboren.
Gloria lof en danckbaerheyt,
Laet ons altoos betoonen,
Die heylighe hooghe Triniteyt,
Een Godt en dry persoonen.
Hem loouen wy in dese feest,
Den Vader Godt almachtich,
Den sone en den heylighen gheest,
Die louen wy eendrachtich.
|
|