Christelijck vermaeck

bestaende in verscheyden stichtelijcke rijmen en gesangen

[p. 74]

Hooghmoedt komt ten val.

Toon: Wel Daphne dus versuft. Of: Doen Cloris door de Min.

AL die door grootsche pracht,
Zijn gheeren hoogh gheacht,
Die worden meest bedroghen,
Al is hy schoon al tot den top,

[p. 75]

En boven alle sterren op,
Hy wort haest neergetoghen.

2 De trotse moedt en waen
En kan niet langh bestaen:
Die veel al waent te weten,
En meent daer deur te zijn ghe-eert:
't Is waen, en oock in waen verkeert;
Hy wordt om-veer ghesmeten.

3 Een trotse Paeuw die swaeyt,
Die spieghelt en die draeyt
Met hoogh-verwaende kueren,
Een yder lacht 'er met, en spot,
Wie sou 'et by een malle Sot
Langh sonder lacchen dueren?

[p. 76]

 

4 Is yemandt totten trap

 

Van brave wetenschap

 

Door konsten opgheheven:

 

Indien hy hoogh van herten is,

 

Al stondt hy noch en noch soo wis,

 

Hy wordt'er van verdreven.

 

 

 

5 Gheen hooghmoedt houdt'er stee,

 

Gheen trotse preutsheydt mee:

 

Maer alles sal verdwijnen.

 

De Heer, een LIEVERvan 'et laegh,

 

Die sendt ghemeenelijck een plaegh,

 

Als trotse heerlijck schijnen.

 

 

 

6 Haman, hoe hoogh hy was,

 

Hy viel als in de ass';

 

Hoe naeder aen sijn machten,

 

Hoe meer hy totte Wolcken klam,

[p. 77]

 

Hoe meer hy voor den Heere quam

 

In leelijcker verachten.

 

 

 

7 De waen is yd'le windt,

 

Die lichtelijck verswindt:

 

Soo oock 't hooghmoedigh brallen;

 

Ghenoeght u met de laghe kant,

 

En houdt u leeghjes achter 't landt,

 

Soo sulje niet hoogh vallen.

     Liever.