Wormen dooden ende af-jaghen.
ALsem alleen oft met eenige spijse inghenomen, oft van buyten op den buyck gheleyt, oft alsemwater, oft saet, dient al tot het selfde, oft alsem-oly op den navel ghestreken ende onder de neusgaten, doodet de wormen.
Huysloock ghesoden, oft 'tsap daer af ghedroncken, doodet de wormen.
Ysop met vijghen ghegeten, is goet voor de wormen.
Centaurea ghesoden ende ghedroncken, is seer goet om de wormen te verdrijven.
'Tsaet van Arange-appelen, is seer goet den kinderen inghegheven.
Reynevaer-saet met suycker of een ghebraden appel inghenomen, is een sonderlinghe medicijne voor de wormen.
Oly van Ypericon ghesmeert op den navel, doot de wormen.
Ghebrandt herts-hooren een drachma inghenomen, verdrijft de wormen.
Ajuyn in schijven ghesneden, ende in water by't vier gheweyckt, desen dranck is seer goet voor de wormen van kinderen.
Auteursrechtvrij