Den schat der armen oft een medecijn-boecxken

[p. 145]

Water maken, urine doen lossen.

'TSap van groote clissen met honigh ghedroncken, doet wel water lossen.

Bladeren van netelen met mosselen ghesoden ende ghedroncken, gheneest de selfde cranckheydt.

Ons Lief Vrouwen Bedstroo met wijn of water gesoden ende gedroncken, is goet voor urine te lossen.

Sali in wijn gesoden ende gedroncken, oft wijnruyt ghegheten, doet water lossen.

Lavendel in wijn ghesoden ende ghedroncken, oft Bevernel-wortel met wijn ghesoden ende ghedroncken, doet wel water lossen.

Boeckweyde-bry oft coecken ghegeten, doet wel water lossen.

Cardobenedictus in wijn ghesoden, ende al warm ghedroncken, helpt wel.

De wortelen van Peen ghegeten oft Pastinake-wortelen ghegheten, desghelijcks Peterceli-wortelen ghegeten, doen wel water lossen.

Kervel in wijn ghesoden ende ghedroncken, ende 't cruyt op de blaes gheleyt, doet wel water lossen.

Peper inghenomen, helpt wel.

Ajuyn in spijse ghebruyckt, Parey desghelijcks, doen wel water lossen.

Brem-bloemen oft 'tsaet in bier ghesoden ende ghedroncken, doet wel water lossen.

Note-muscaet in vierendeelen in oly gheleyt, ende daer alle daghen een half af ghegeten, met een lepel oly, versaecht seer, ende doet wel water lossen.

Asschen van witte wijngaert, ende Brem-asschen in dranck ghedroncken, doet wel water lossen.

Netel-wortel ende Mirredick-wortel in wijn ghesoden ende ghedroncken, ghenesen die niet wel can wateren.

De Meesters seggen, dat wilt vlas in water gesoden ende ghedroncken, doet 't water rijsen.

[p. 146]

Camillen ghesoden ende ghedroncken, ende van buyten op de blase gheleyt, doen 'twater rijsen.

De wortel van blau lelien met wijn ghesoden ende ghedroncken, doen wel urine maken.

Thymus in water ghesoden ende ghedroncken, doen wel wateren.

Kool ghesoden met azijn inghenomen, doen wel water rijsen.

Drooghe vijghen voor den eten ghegeten,doen saechtelijck water rijsen.