Den schat der armen oft een medecijn-boecxken

Vrouwen natuerlijcke cranckheydt verwecken.

MVer-bloemen ghedrooght, ende in water ghesoden daer in gheseten, ghebaedt, ghestooft, oft 'tsaet een half loot swaer met wijn ghedroncken, helpt wel.

Goudtbloemen alleen oft met het cruydt in water ghesoden ende ghedroncken.

Camille-bloemen ende cruyt met wijn ghesoden, ende ghedroncken, gheneest soodanige cranckheyt.

Thym met honigh in water ghesoden ende ghedroncken, helpt wel.

Marioleyn in witten wijn ghesoden, ende ghedroncken, helpt de Vrouwkens.

Scharley in alderley maniere inghenomen ende ghebruyckt, is goet.

Bladeren van wijnruyte ghesoden ende inghenomen.

Bevernel-wortelen in wijn ghesoden ende ghedroncken, ghenesen de cranckheydt der vrouwen.

De bladeren van Bethoni gedrooght een vierendeel loot swaer met honigh inghenomen, ghenesen de vrouwen.

[p. 143]

Die wortel van lavas gedrooght, ende met wijn ghedroncken, gheneest wel.

'Tsap van Centaurea inghenomen, is oock goet.

Pioni-wortel gedrooght, ontrent een boon groot met mede ghedroncken.

De wortel van Eryngium ghesoden ende ghedroncken.

Cardobenedictus in wijn ghesoden ende al warm ghedroncken, gheneest soodanighe cranckheydt.

'Tsap van Peen met wijn ghedroncken, helpt wel.

Mostaert-saet met wijn oft mede ghedroncken, gheneest de selfde cranckheydt.

Loock ghesoden ende daer in gheseten, oft op gloeyende colen ghebrandt, ende den roock van onder ontfanghen.

Parey inghenomen, gheneest de natuerlijcke cranckheydt der vrouwen.