Den schat der armen oft een medecijn-boecxken

Pleuris ghenesen.

PLeuris is een sweeringe int lijf met een onlijdelijcke pijn, daer men terstont raet moet toe doen, ende men moet den Mediaen doen laten binnen 24. uren.

Gersten-bry wel ghesoden ende ghegeten, ende strijckt de pijnlijcke plaetse met camil-oly, het ge-neest het Pleuris.

Syrop oft conserve van violetten ghegeten, oft suycker-candy oft wit suycker ghegeten, versaecht de pijn van Pleuris.

Mageleyn met honigh vermenght, dickwils gheleckt, versaecht de pijn van Pleuris.

Cassia Fistula met vercoelende water ontrent een once swaer inghenomen, gheneest Pleuris.

Eenen appel wat uyt-geholt ende wieroock manneken, genaemt Olibanum, doet dit inden appel ende

[p. 122]

leghter stucksken wederom, ende braedet soo, dit dan ghegeten, helpt voor pleuris.

Cardobenedictus dry handt vol in water ghesoden, ende nuchteren ghedroncken ses oncen, ende daer op ghesweet, gheneest het pleuris.