Monts verhittinge vercoelen.
WAter daer Ganserick in gesoden heeft, 'twelck men noemt Blick of Argentina, ende den mont daer mede ghespoelt, is goet voor viericheyt ende verhittinghe.
Aertbesien cruyt ghesoden met cleyn bier, ende den mondt daer mede ghespoelt, suyvert ende vercoelt den mont.
Kernen van Granaet appelen ghestooten, met Honich vermenght ende aen het tantvleesch gestreken, ende wederom met lau water af ghewasschen, vercoelen den vierighen mont.
Diamorum met weechbree water gemengt, ende den mont mede ghespoelt ende ghegorghelt, neemt wech die viericheydt.
Neemt dry of vier gloeyende kolen viers, laetse blusschen in water, latet daer na wat staen sincken ende gietet claer boven af, ende weltet wederom op met Honich van roosen, ende den mont daer mede ghespoelt, gheneest den mont die verhit is.
Aelbesien inden mont ghehouwen, vercoelen die verhittinghe des monts.
Honich van roosen inden mont ghenomen, vercoelen die hitten des monts.
Vijghen opghesneden, ende 'tsaet wt ghedaen, ende ghekoockt met water ende lijnsaet tot datse splijt, hier mede gespoelt, doet vergaen die geswellen des monts.
Auteursrechtvrij