Den schat der armen oft een medecijn-boecxken

Geelsucht ghenesen.

DIe Medecijn-Meesters segghen, dat Oogentroost in wijn ghesoden zijnde ende ghedroncken, gheneest de gheelsuchte.

Desghelijcx den plante van Tormentil met den wortel ende bladeren ghesoden ende ghedroncken, gheneest de geelsuchte.

Die wortelen van Weechbreede alleen, of met het saet in soeten wijn ghesoden ende gedroncken, gheneest de geelsuchte.

Senegroen of Basilicon inghenomen, ghekoockt zijnde, gheneest de geelsuchte.

Drinckt u eyghen water met Merredick wortel ghestooten, ghy sult baet vinden voor die gheelsuchte.

Roosemareyn in water gesoden ende nuchteren

[p. 75]

ghedroncken, gheneest die gheelsuchte.

Lavendel bloemen alleen, of met Caneel, Notemuscaet ende Nagelen, ende Suycker gemengt, of conserve van Lavendel bloemen inne genomen, gheneest de gheelsuchte.

Centaurea in Bier of wijn ghesoden ende inneghenomen helpt teghens de gheelsuchte.

Bladeren van Alfs rancken in wijn ghesoden, ende inne ghedroncken, is goet voor gheelsuchte.

Saffraen gebesicht, is goet voor die geelsuchte.

Wit ghestooten Kempsaet in Melck gesoden en deur ghedoen en dan werm ghedroncken, is wonder goet voor die geelsuchte.

Cattecruyt ofte Nippe in Melck ghesoden ende ghedroncken, is seer goet voor die gheelsuchte.

Surick of Surckel in Melck ghesoden deur gedaen ende dan ghedroncken, is goet voor die geelsuchte.

Neemt ghepelde Rosijnen een vierendeel, twee loot gepelde Gerste, een hantvol Aertbesien cruyt, dit ghekoockt en deur ghedaen ende gedroncken, helpt teghens die gheelsuchte.

Pier wormen geknuest, ende met goeden Rensche wijn op ghestooten ende deur ghedaen en gedroncken, gheneest de geelsuchte.