Fluymen doen scheyden ende af jaghen.
DIe gheleerde Doctoors inder conste der Mecijnen seggen, dat Anijs saet op 'tvier gedroocht ghepulveriseert en met Honich ghemenght ende inghenomen, maeckt de fluymen los ende doetse scheyden.
'Tsaet van Averone in wijn ghesoden deur gedaen zijnde ghesoet met suycker, en dan gedroncken, verdrijft de fluymen.
Thymus cleyn ghescherft en met Honich vermenght, en dickwils gheleckt, ruymt fluymen.
Soete melck met fijn Tarwen meel ghekoockt met een goet stuck boters en warm ghegheten, dit doet fluymen scheyden.
Consolida major, 'twelck is Wal-wortel, ghesoden ende met Honich op gewelt, ruymt de fluymen vande borste alsmen hier af drinckt.
Thuynkers saet met hoender nat of ander vochticheyt in ghenomen met wat Suyckers, geneest ende suyvert van fluymen.
Syroop van Ysope geleckt, ruymt de borste van fluymen.
Auteursrechtvrij