Alle fenijn verdrijven en wederstaen.
DIe Herbaristen segghen, dat den roock van onse vrouwen bedstroy, verdrijft alle fenijnige ghedierten.
Ruyte nuchteren ghegeten, of met het sappe bestreken, wederstaet het fenijn.
Anyssaet ghepulveriseert met wijn ghedroncken, wederstaet het fenijn.
Cardo benedictus in alle manieren ingenomen, is goet teghens fenijn.
Maluwe met die wortelen in Bier ghesoden, ende ghedroncken lau, met een stuck Boters, ende terstont daer na weder overghegheuen, verdrijft het fenijn.
Peterceli wortelen, of het saet 'twelck beter is, ofte t'samen in water ghesoden ende gedroncken, helpt teghens fenijn.
Den roock van Mostaert-zaet, verjaecht alle fenijn, ende alle fenijnighe ghedierten.
'Tzaet van Thuyn-kerse, gebrant, verjaecht alle fenijnighe ghedierten.
Loock in spijs ghekoockt ende gegeten, is goet teghens alle fenijn men macht oock in wijn sieden ende drincken.
Vijghen met Sout, Ruyte, ende Ockernoten gegheten, is goet voor fenijnighe luchte.
Raphanus, dat is Mirredick-wortel ghegheten, wederstaet het fenijn.
Venckelsaet ghepoedert met wijn inghenomen, is goet teghens fenijn.
Driakel voor den eten, ende na den eten inghenomen, is goet teghens fenijn, ende alle onreynen cost ghegheten.
Hier toe dienen oock veel slechte dinghen, als Ruyte, Ockernoten, Vijghen, Salie, Tormentil, Bakelaer: Ende die voor fenijn sorghe hebben, sullen
Auteursrechtvrij