te tot een coecxken ghebacken, is een schoone medecijne voor den buyckloope.
Porcelijn ghegeten stopt wel den buyckloope.
Onrijpe Stekelbesien gegeten in spijse gekooct, dienen omte stoppen den loope.
Kernen van Granaten inde Sonne ghedroocht gepoedert ende ingegeuen, oft in rooden wijn ghesoden ende gedroncken, zijn seer goet ghenut voor den buyckloope.
Queecruyt datmen inden Apteec te coope vint, voor den eten inne genomen, stopt den buyckloope.
Suerachtighe wringhende Peyren met rooden wijn ghestooft en ghegheten, stoppen den loope.
Amandelen voor de maeltijt gegheten, gebruycken die rijcke luyden omme te stoppen den loope.
Wijn Tint ghemenght met water daer stael in geblust is ghedroncken, dient wel om te stoppen.
Soete Melc versoden op die helft, met wat waters voor die vuyricheyt en heet gedroncken, stop den loope.
Fijn tarwen Meel inden ouen ghedroocht ende met Melck ghesoden ende een Eye onder gheroert ende dan ghegheten, gheneest den loope des buycx.
Beschuyt met dicken rooden wijn inghenomen, stopt wel den buyckloope.
Slee-pruymen inden ouen ghedroocht, en dickwils ghegheten en de steenen deur gheswolghen, doen den buyckloope ophouden.
Hasenoten ghebrant en gepulveriseert, in Soetemelcx pappe ghekoockt ende ghegheten, stopt wel den buyckloope.
Candeel van Bier met Eyeren ende Brandewijn ghemaeckt, ende dat ghedroncken, gheneest wel die flaeu zijn vanden buyckloope.
Men sal heete doecxkens op die maghe leggen ende op een warme stoue sitten, ende houden hem stillekens, dit gheneest den buyckloop.
Auteursrechtvrij