Borst ghebreken goet.
DIe Herbaristen willen segghen, dat Gariophilaet, die wortel in wijn ghesoden ende ghedroncken, gheneest een quade borst.
Den doyere van een versch ey inde plaetse van't wit, neemt Renschen wijn, ende daer mede ghemengt, gestooten Caneel en wat Suyckers is goet inghenomen voor hoeste, maeckt terstont versch bloet, gheeft sterckte ende is licht om te verteeren.
Ysop ghesoden met cleyn bier ende Honich, gedroncken, gheneest die borste.
Drooghe Vijghen rau of ghebraden ghegeten, gheneest de borste.
Soet-hout of Drop soet hout ghenutticht, gheneest de borste.
Soetmelck ghesoden met Sali en suycker, ende dit werm ghedroncken, gheneest de borste.
Confijte Alantwortel diemen inde Apteec te coope vint, is goet gegeten voor fluymen op de borste.
Mostaert ghegeten, opent ende verwermt inde borste.
Auteursrechtvrij