Den schat der armen oft een medecijn-boecxken

Vander Maghe.

DIe gesontheyt des Maegs wort onderhouden door maticheyt van spijse ende dranck te nutten, en datmen op sijnen ghesetten tijt eet ende drinckt, want alsmen buytens tijdt veel eet of drinckt dat belet het teeren des Maeghs, ghelijck

[p. 19]

een pot die aent vier staet en kooct, alsser cout water in ghegoten wort terstont het koken oft het sieden belet, soo mede ist met die Maghe alsmen buytens tijt dickwils eet oft drinckt. Ende als die spijse inde Mage niet te recht verteert wort, dat schaet den gheheele lichaem. Ghelijck als die wortel van een boom gheen voetsel ontfanght, soo beghint die heele plante te verdorren, soo mede als de Maghe ongestelt is, so ontsteltet al datter aen 'tlichaem is, ende daerom groote sorghe, becommerde sinnen, verhouwen winden crencken de Mage seer, maer boven al overvloedicheyt van spijs ende dranc. Alsem-bier of Alsem-wijn is goet ghedroncken voor een quade Maghe.