Vande Ooghen.
DIe ghesondtheyt der Ooghen wordt onderhouden met sober avondtmael t'eten, want gheen dinck en hindert soo seer het ghesicht als den slaep met een overladen maghe, bysonder over dagh. Alle groene dinghen, als Boomen, Bladeren, Velden ende andere groenigheyt vermaken ende verstercken het ghesichte, desghelijcks heeft het ghesicht vermaeck in schoon water te beschouwen, oft in spieghelen. Cout water in een groene aerden teyl ghedaen met wat wijnruyts, ende daer altement de ooghen in ghewasschen, versterckt het ghesicht. Maer stercke winden, stof ende vuyligheydt, tegen wit ghestadigh te sien, krenckt het ghesichte. Ooghentroost, Wijnruyt ende Venckel zijn dry sonderlinghe goede dinghen voor de ooghen, inwendigh oft uytwendigh ghebesight.
Auteursrechtvrij