Ghemeene seyndtbrieven

Elck een behoort in zyn staet ende roepinge te vreden te wesen.

SEer beminde vrienden D.C. v sal believen te vveten dat vvy al t'samen Susters ende Broeders zyn van een Hemelsche Vader, ende al t'samen litmaten van een hooft Iesus Christus, En heeft ons al t'samen nae zijn beelt gheschapen ende gemaeckt, ende heeft elck bysonder zijn leuen ghegheven, ende een Ziel die costelijcker is dan al 'tgoet vande Werelt, vvaerom dat niemant behoort ondanckbaer te vvesen, oft te claghen in wat staet of roep, oft conditie van leven hy yemandt gheroepen heeft,

[fol. B8v]

'tzy rijck oft arm, hooch oft leech, Coopman oft Ambachtsman, want Godt also belieft vvaerom wildy claghen, al dat ghy hebt dat hebdy om niet ghekreghen, of sal die Pot segghen teghen den Pottebacker, waerom hebdy my ghemaeckt een vat van eeren oft oneeren, oft sullen die lidtmaten claghen, datse aent hooft oft aen de voeten staen. Vrient vveest met den uwen te vreden, u en gheschiet gheen onghelijck al duncktet u, ghy en vveet niet vvaer een ander die schoen dwingt. Mogelijck waerdy in een ander zijn stede, ghy sout noch meer cleghen, vvant elck een meent dattet vetter is in een ander mant schotel Weest dan met u deel te vreden, en helpt malcander die lasten draghen in u beroepe, Soo suldy vervullen die Wet Christi.