Ghemeene seyndtbrieven

Die soon schrijft om eenich goet.

LIeve seer beminde Vader ende Moeder N.N. Ick ontbiede v l. hondert duysent ghoede nachten, En laet u vveten dat ick noch cloeck en sterck ben Godt heb lof, als ick verhope dat ghy mede zijt, met al ons huysghesin ende vrienden. Voort beminde Ouders is die oorsaecke mijns schrijvens dat ick van doen hebbe een Wambus met een Hoet, vvant mijn oude cleeren by nae versleten zijn. Ick bid v ootmoedich dat ghy v toch niet laet verdrieten een vveynich costen aen my te hanghen, vvant ick hoope soo vvel mijn neersticheydt te doen met studeren dattet al dubbelt vvederom in sal comen. Wy leeren nu rechtevoort brieuen nae schryven ende

[fol. B8r]

translateren ende componeren, die alderbest zijn deuvir ghedaen heeft, die vvort vande meester ghepresen, ende begaet groot eer van een yeghelijck: Maer die niet vvel ghedaen heeft, die wort beschaemt. ende vvant ick voor schande vervaert ben, ende geerig eer begae, soo doe ick altijt groote neerstcheyt om een ander voorby te leeren: waerom ick oock menich lecker beetken van mijn Meester cryghe, daer een ander op sien moet. Maer ick en passe daer niet veel op, dan ick lette meest op mijn eyghen selfs profijt ende vvelvaren in't leeren, ende oock denck ick dattet v aen ghenaem is dat ick neerstich ende vvel leere.

Beminde Vader ende Moeder, zijt hier mede den Heere bevolen, ende en vvilt niet laten te seynden daer ick om gheschreven hebbe. Ende groet my seer belieftet u, mijn beminde susters ende broeder. Gheschreven in Haerlem den xx. Iulij. Anno 1588.