Van tragedien en ander comedien te spelen.
Laus Deo semper, in Haerlem.
EErweerdighe seer beminde Vader ende Moeder I.A. Is dat ghy vvel vaert, soo ist vvel, vvant ick oock vvel te passe ben, Godt heb lof. Mijn schryven is niet bysonders, dan dat ick v vriendelijck bidde, dat u believe dese Sint Iansmis alhier over te comen om v vvat te vermaecken in dese soete lucht. Wy sullen tot onse Meesters een schoone tragedie spelen van een Ionckman die hem eerst schickt totter deucht, ende naemaels verleydt zijnde deur die vvellusticheydt des vleys, en duer quaet gheselschap, ende duer medehulpinghe der duyvelen, comt ten lesten te smooren in zijn sonden, waer deur hy comt tot die eeuwighe verdoemenis ende pyne der hellen. Dese tragedie is seer beweechlick om aen te sien. Ende onse Meester laet on somtijts een Comedie oft Tragedie spelen, om dat vvy daer deur souden leeren goede manieren, oock welspreken, maer principalijck die vvy ende al die gheen diet sien, daer deur souden gesticht ende gheleert vvesen, als deur een levendich exempel, hoe wy ons leuen sullen aenstellen, om het quaet te schouwen ende goet te doen, om eerlijck te leven ende salich te sterven. Beminde Vader zijt hier mede den Heere bevolen.
Gheschreven in Haerlem desen xviij. Iunij. Anno 1588.
By my I.I. u onderdanighe Soon.
Aenden eersamen ende vromen Coopman N.N. mijn seer beminde Vader. Tot Enchuysen.
Auteursrechtvrij