Twee puncten om wel te regeeren.
DEuchtsame vrient W. Ist dat ghy vvelvaert, soo ist vvel. Ick vare oock vvel Godt danck. Soo ick verstaen hebbe dat ghy inde regeringhe des Stadts gheroepen zijt, heb ick niet connen laten v midts desen gheluck te bieden, ende eenighe goede vermaninghe te doen om u een eynich daer nae te voeghen, vvant ghoede vrienden zijn schuldich malcander ten besten te raden. Ick vvilde vvel van uwent vveghen dat ghy alsoo regeerden, dat u die ghoede menschen beminden om u goetheydt ende die quade Menschen ontfanghen om v rechtveerdicheydt, vvant alle gemeenten moeten met twee deelen vvel gheregeert vvorden, met straffinge aen die quaden, ende met goede vrientschap ende vergeldinghe aen den goeden. Want alsmen den quaden ende boose menschen niet en straft soo vvordense veel luyden tot boosheyt verweckt. Ende alsmen noch die goeden niet in eenen ende in vvaerden en houdt, en haer in last ende noot bystant doet en vriendtschap bewijst, soo slabbackt en vergaet die couragie tot vveldoen. Daerom varen sulcke landen, steden, dorpen, scholen, Huysghesinnen alderbest, daermen die goede meest eert, en die quaden meest straft, en dat inde redelyckheyt. Maer voor al is nootsakelijck die een ander vvel regeren sal, dat hy hem selven eerst vvel regeert deur een oprecht deuchdelijck leven, En dat hy niemant en onstichte met een quaet leven. Want die sulcx doen nae mijn beduncken zijn onnut eenich treffelijck officie te bedienen. Beminde vrient zijt hier mede den Heere bevolen, en vaert vvel.
Auteursrechtvrij