Ghemeene seyndtbrieven

Hoemen treffelijcke saken beginnen ende voleynden sal.

SEer beminde vrient D. Soo ghy op my begheert hebt dat ick v soude schryven een sekere manier om een saeck daer macht aen leydt vvel aen te legghen, ende met eenen ten eynden te brenghen. Om onse oude kennisse ende vrientschap te onderhouden heb niet moghen laten mijn aduijs ende goetduncken daer op te schryuen. Inden eersten soo aenmerckt oft oock betamelijck is dat ghy aenveerden vvilt voor u persoon ende tijt. Daernae soo bidt God den Heer om gratie. Ten derden, ghebruykt voorsichticheydt en versint eer ghy begint. Ten vierden, als ghy verstaet dat het werck goet is, ende voor u betamelijck, soo valteraen met een stercke moet. Ten vyfden doet u vverck met blyschap, ende ten lesten, blijft volstandich in u goet propoost ende voornemen. Maer voor al siet voor u dat ghy min oft meer

[fol. B2v]

en aenvaert dan ghy soudt connen volbrenghen, want beginnen ende niet te volbrenghen is groote schande. Want men seyt ghemeenlyck voor en spreeckwoort: Het zijn goede spillen die lancksaem draegen ende vvel opnemen. Dat is, die soo haer vvercken toelegghen, dat zy vvel beginnen ende niet vvtscheyden voor dat het vverck volbracht is.

Beminde vrient, siet dat is mijn aduys ende goetduncken om een treffelijcke sake te beginnen ende te volbrenghen, vveet ghy yet beters, ick vvilde vvel dat ghy my ontboot ende met den eersten liet vveten. Vale.