Ghemeene seyndtbrieven
(1597)–Heyman Jacobs–
Auteursrechtvrij
[Folio B2r]
| |
SEer beminde vriendt G. Ick seynde u een milleoen ghoede nachten, vvant wy goede vrienden zijn, ende soo ghy u tot het studeren begeven hebt, Soo vermaen ick u dat ghy principaelyck wilt schicken te lesen ende te leeren alsulcke boecken, die v alderbest dienen om een geschickt leven te leyden. Want die boecken zyn als het gheselschap. Goed gheselschap maeckt den menschen goet, en quaet gheseclschap quaet, soo mede ist met die goede en quade boecken. Van goet te lesen comt altijt goet af, vvant hier deur vvort een mensch sonderling deur die gratie Gods verlicht, dat hy vveet vvat hy behoort te doen of te laten. En al en cant een mensch niet al onthouden dat hy leest, en is daer eenichsins af verbetert, ghelijckerwijs als vaten daermen vvelrieckende speceryen in leyt, daer pleech oock den reuck een vvijl tijts in te blyven. Daerom soo rade ick u in alder manieren, dat ghy duechtsamighe boecken wilt lesen, daer ghy u selven ende u naesten mede ter salicheydt moecht helpen. En zijt den Heer bevolen. |
|