Die vader vermaent zijn soon wel te leeren.
BEminde Soon P. Soo v neef N.N. oock by v metter vvoon comt, ouermidts dat v studeren soo vvel voort gaet en heb ick niet moghen laten v een cleyn briefken te seynden, vvant ick verstae van anderen dat ghy te beter leert als ick altemet aen v schrijve.
Mijn begeeren is dan dat ghy u vvterste neersticheydt sult doen om vvel te leeren, op dat ghy savons oft morghen met eeren moecht vvederdom thuys comen, als ick u ontbieden sal, vvant versuymt ghy nu u costelijcke tijdt, soo sult ghy v noch nae belaghen, maer ick hope dat ghy beter besint sult vvesen, die gheleertheydt is het alderbeste patrimoni goet dat ghy ontfanghen meucht, by vvelcke al 'tgoet vande Werelt niet te ghelijcken en is, dan soo moecht ghy dencken vvat schade ghy v selven doet als ghy niet en leert, ghy onsteelt v selven het alder best dat ghy inde Werelt hebt, dat is die costelijcke tijt, ende ghy onsteelt my het gelt vvt mijn Cantoor als ghy niet vvel en leert.
Daerom beminde Soon schickt neerstich te leeren, ende schout traecheyt ende luyicheyt, En vveest v Meester en Vrou ghehoorsaem, vvacht v voor stouticheyt, vechten, sweeren, kyuen, ende ontrouwicheyt. Ende maecktet alsoo dat ick niet dan deucht, van u en hoore.
Dit doende sult vvel doen, en blijft den Heere bevolen. Gheschreven in Leyden desen x. Iulij. Anno 1588.
Al uwe beminde Vader. N.
Aen P.I. onse beminde Sone, vvoonende tot Haerlem.
Auteursrechtvrij