Waer af alle bederffenis comt inde Christenheyt.
BYsondere specialen vriendt, nademael ghy op my begeert hebt dat ick v mijn Advys Ende goetduncken soude schrijven, vvat die principael oorsaeck is vande bederffenisse vande Christen Religie, soo heeft my goet ghedocht u hier in te believen ende u te kennen te gheven, vvaer vvt alle dese plaghen comen over die Landen. Soo dunckt my dat al dit quaet comt overmidts onse sonden,
vvaer mede vvy Godt den Heer vertornen, ende hem met al ons gheluck en salicheydt van ons drijven, vvy hebben die naem vvel van Christenen maer vvy leven niet Christelijck. Een Christen mense behoort dickwils te dencken op zijn sterfdach op den dach des oordeels, op die pijn der hellen, op zijn eeuwighe salicheydt, ende op het leven ende het lyden ons Salichmakers Iesu Christi. Ende behoorden daer en boven Godt den Heer dickwils om gratie te bidden, hem selven te oeffenen int lesen vande goede boecken, ende hem te begheven tot alderhande vvercken van barmherticheyt Maer overmits dat vvy hier niet op en passen, soo comen vvy tot alle bederffenisse nae ziel ende lichaem. Ghelijck een tuyn oft Bos moet onderhouden vvorden, of daer sal niet goets in wassen. Soo mede moet een Christen mensch zijn leven geregeert vvorden, of daer sal niet goets af comen. Dit is d'oosaecke dat veel Christenen vvel goet van gheloof, maer niet goet van leuen zijn, want zy hebbent gheloof als een sweert inde sche, oft Medecijn inde doot, dat niet ghebruyckende nae behooren. Ende daerom leven die menschen sonder die vreese Godts in alle boosheydt , en dat is (nae mijn advys) die bederffenisse inde Christenheyt.
Auteursrechtvrij