Ghemeene seyndtbrieven

Eenen brief van nieuvve tijdinghe.

EErsame seer beminde vriendt P. Ic gebiede my met alle vriendelijckheydt in u goede gratie.

Ende overmits onse oude kennisse ende vrientschap heb ick niet moghen laten dese teghenwoordighe aen v te schrijven, hoopende dat ghy 'tselfde in danck sult ontfanghen. Al hier loopen verscheyden nieuwe tijdinghen, maer ofse al vvaer zijn dat en vveet ick niet vvant daer vvort veel gheloghen.

Onder ander seytmen dattet vvel haest pays sal vvorden, vvant die luyden zijn al moede geoorlocht, vvanter niet af en comt dan alle bederfenisse nae ziel

[fol. A7v]

ende lichaem, ende van vrede zomt alle gheluck voorspoet ende salicheyt. Wy souden vvel haest vrede hebben met die menschen, vvant dat vvy eerst vrede hadden met Godt, en dat vvy al t'samen ons sondighe leven beteren, vvant die sonden zijn oorsaeck van crijch ende oorloch ende van alle plaghen, die ic sorghe dat vvy noch niet al en hebben, ouermidts die groote overdaet die daer ghebruyckt vvort inde cleedinghe, vvy behooren ons te schamen met ons cleeren so te proncken, vvantse ons alleen verleent zijn om ons naeckte leden mede te cleen, vvaertoe dat Adam ende Eva alleen gegeven vvorden van God den Heer schaeps vellen om haer schamelheydt daer mede te decken en niet om te proncken, maer tot een beschaemtheydt dat zy Godt ghebodt overgetreden hadden. Ooc seytmen dat in die nieuwe gevonden eylanden veel menschen bekeert vvorden tot ons H.Christen gheloof, die Heer zy ghelooft. Ick hope dat vvy noch al t'samen in een schaeps-koy sullen comen daer Christus die Herder af is, die ick v l. bevele.