Quaet gheselschap behoortmen te schouwen.
MIjn seer beminde vrient C.I. ghebiede in u ghoede gratie, overmidts ons oude kennisse ende vrientschap. So schrijf ic van ghoeder herten tot u, vermanende quaet gheselschap te schouwen als fenijn: Want men seyt ghemeenelijck, die met Peck omgaet die vvorter mede besmet. En die met quaet gheselschap om gaet, Die sietmen ghemeenlijck mede quaet vvorden. Want het gheselschap doet dolen. Ghelijckerwijs alsmen siet dat het eene schorfde schaep besmet het ander: Ende een verrotte appel die onder die anderen leydt, bederft veel ander appelen. Soo mede bederft quaet gheselschap ander menschen. Want der menschen natuer is meer gheneghen om het quaet te aenveerden dan het goet.
Daerom beminde vriendt rade ick u in alle manieren quaet gheselschap te schouwen: Als zijn dronckaerst, dobbelaers, hoereerders, leughenaers, Ketters, vvant die sulcx zijn, die sullen 'trijcke Gods niet besitten. En verkeert met den goeden, so sult ghy mede goet en deuchdelijck vvorden.
Auteursrechtvrij