neur de la Compagnie où on l'a associé: Au contraire, Monsieur, quand ie considere tout le passé, ie trouue qu'il n'est guere sorti de choses effectiues et memorables de ceste Academie là et qui en aijent illustré la reputation, que celles de son creu. Je ne veux point entrer dans la pensée de ce que de la jalousie pourroit [estre] cause d'enuie en d'aucuns, de veoir un tel collegue plus tost esloigné que pres. Ma question n'est que de sçauoir, si l'on persiste encor dans la bonne opinion que la france a eue de luy, et que je croij que tout le Monde sçauant continue d'en auoir, et si on sera encore d'avis de le luij tesmoigner honorablement ou bien, si la jouissance en aura rallenti l'appetit, de sorte qu'on se dispose à le negliger comme piece inutile. C'est seulement cela, monsieur, de quoij vous estes prié de nous procurer quelque esclaircissement d'aupres de ceux qui ont ceste sorte d'affaires soubs leur conduitte. car, comme vous pouuez juger, il importe qu'enfin on sache a quoy l'on aura a se determiner, sans plus viure et flotter à meubles mipartis entre Paris et la Haije. Si
ces instances recommencent à vous ennuijer, permettez moij de vous renuoyer à mes deux pretextes que j'aij arrangez d'entrée sans y rien ajouster que ceste tres veritable et tres-ancienne verité que je suis et mouraij, etc.
Auteursrecht onbekend