Oeuvres complètes. Tome VII. Correspondance 1670-1675

N^o 2064.
H. Oldenburg à Christiaan Huygens.
21 octobre 1675.

La lettre se trouve à Leiden, coll. Huygens.
Elle s'est croisée avec le No. 2062. Chr. Huygens y répondit par le No. 2069.

A Londres le 11 octobre 1675.

Monsieur

Depuis ma derniere il est arrivé icy vne chose qui m'oblige de vous escrire celle-cy. C'est que M. Hook, ayant sceu que vous m'auiez donné la permission de me servir de l'avantage que vous pourriez pretendre d'un privilege pour vostre montre en ce païs icy¹⁾, a esté si temeraire et impudent, que de dire publiquement, que vous m'auez donné cete permission en recompense de vous auoir descouvert son invention, y adjoustant auec la plus grande effronterie du monde, que ie suis icy vostre espion pour vous communiquer tout ce qui se descouvre icy de considerable, et que ie l'ay voulu defrauder du profit de son invention. Comme ce sont des accusations aussi atroces que fausses, et que ma reputation, qui m'est plus chere que la vie, y souffre extremement, vous ne ferez point aucun scrupule, Monsieur, scachant mon innocence, que d'escrire à nostre President, Mylord Brouncker²⁾, que cet homme lá me fait le plus grand tort du monde, et que sur vostre honneur (la chose, que vous ditez, estant veritable) ie ne vous ay iamais rien communiqué de cete invention, ny d'aucune autre, qu'apres que vous nous auiez descouvert la vostre; apres quoy ie vous aye fait scauoir, que ce calomniateur en auoit inventé quelque chose de semblable³⁾. Monsieur, ie vous prie de dire la verité de tout, aussi pleinement qu'il vous sera possible, et auec telle force, que la chose le

1) Voir la Lettre N^o. 2013.

2) Consultez la Lettre N^o. 2070.

3) Voir la Lettre N^o. 2016.

[p. 514]

requiert, á fin de vindiquer ma reputation aussi bien que la vostre; sans quoy ie patirois beaucoup à vostre occasion, au lieu d'en tirer aucun avantage, vû que nostre homme s'est tellement prevalu à la Cour, qu'on luy donnera un privilege, auec vn rebut entier de ce que i'y ay voulu pretendre à vostre nom et par vostre bonté. Cependant i'espere, que vostre seconde montre est sur chemin; ce que Mylord Brouncker souhaite fort, croyant que le defaut de la premiere se trouvant corrigé dans la seconde, il la pourra mettre icy en credit, non obstant le grand cri de nostre effronté, lequel s'appuyant sur ce qu'il est natif, croit de pouuoir opprimer vn estranger, le plus innocent du monde. Monsieur, vous ne ferez aucun delay en cete affaire, ce que ie me promets de vostre justice; mettant vostre lettre audit Mylord soubs mon couvert, addressé á Grubendol, comme de coustume.

Dum existimatio est integra, facilé solatur egestus honestatem: C'est la devise

Monsieur de

Votre treshumble et tresobeissant serviteur H.O.

Monsieur, apres vous auoir servi de cete lettre, vous la mettrez au feu, ie vous prie.

Pour donner quelque raison de ce que vous auez voulu m'offrir l'advantage de vostre montre en ce pais icy, vous pourrez dire (ce qui est, ie pense, la pure verité) que scachant les peines, que ie prends et ay prises par tant d'annees, pour faire advancer toutes sortes de sciences solides et utiles, et pour resveiller les gens d'esprit par tout le monde à fin de s'y appliquer serieusement; et d'ailleurs scachant aussi, rem mihi esse angustam domi, vous auez voulu tesmoigner vostre affection envers moy en me faisant ledit offre etc.

A Monsieur Monsieur Christian Hugens de Zulichem, dans la Bibliotheque du Roy à Paris.

10 β