Oeuvres complètes. Tome II. Correspondance 1657-1659

N^o 415.
[J. Chapelain] à Christiaan Huygens.
19 octobre 1657.

La lettre se trouve à Leiden, coll. Huygens.

Monsieur

De Paris ce 19^e Octobre 1657.

La visite que j'ay receüe de Monsieur Boüillauld à son retour de Hollande m'a esté dautant plus agreable qu'elle m'a donné lieu de m'enquerir de vos nouuelles,

[p. 68]

et d'en apprendre d'aussi bonnes que je les souhaittois, soit pour vostre santé, soit pour vos estudes, et entre vos estudes pour ce qui regarde le Systeme de vostre Saturne. Car pour ce dernier, ayant veu passer le mois d'Auril que vous auiés pris pour terme, sans que vous m'eussies fait sçauoir si le Ciel vous auoit confirmé dans l'opinion qu'il y auoit vne Lune qui tournoit autour de cette Planette si esloignée de nous; je vous auoüe que je commençois à me desfier de l'obseruation que vous en auiés faitte, et que j'auois regret à vous auoir conseillé d'en publier la descouverte dans la crainte que le Monde, n'y trouuant pas la realité qu'il s'en estoit promise, ne vous blasmast d'auoir esté trop leger à la croire, et à l'assurer. Mais l'entretien que j'ay eu auec nostre Amy sur cette matiere a dissipé toutes mes apprehensions, et m'a donné vne joye extreme de voir que vostre Telescope ne vous auoit point trompé, et qu'il vous auoit fourny de quoy accroistre si notablement la science des Astres. Il m'a rauy en m'assurant que non seulement vous auiés retrouué vostre Lune, mais que vous en auiés encore obserué le cours, et que vous auiés marqué au juste le temps de sa reuolution autour de sa Planette. Il m'a dit que vous la luy auiés fait voir plus d'vne fois tres distinctement, et que c'estoìt desormais vne chose constante, et hors de tout soupçon d'erreur: C'est, Monsieur, de quoy je n'ay peu m'empescher de me resjoüir auec vous, pour la part que je prens à vostre gloire, aussi bien que pour l'vtilité que l'Astronomie receura d'vn trauail aussi heureux que celuy là. Je vous en ay voulu encore feliciter, pour l'esperance qu'vn si bel essay me donne, que vous n'en demeurerés pas en si beau chemin, toute sorte de raisons voulant que la plante qui a peu si jeune porter vn si rare fruit, ne le portera pas seul, et que quand elle sera venüe à sa grandeur naturelle, elle en produira de plus excellens encore, et remplira toute la Terre de sa bonne odeur. Je vous augure cet auantage par cet Apollon, auec qui vous croyés que j'ay quelque familiarité, et cependant je vous demande vn esclaircissement plus net et plus estendu de ce que m'a dit succintement Monsieur Boüillauld, sur la verité et la reuolution de cette Lune, asin que je le face valoir auprès de nos curieux, et que partout ce que je pourray contribüer à l'affermissement de vostre belle reputation, je vous face connoistre que je suis veritablement¹⁾

1) La lettre n'est pas signée.