Briefwisseling. Deel 6: 1663-1687

6925. Aan prins Willem III¹⁾. (K.A.)

V.A. aura veu par les dernieres lettres d'Orange, et verra, s'il luy plaist, plus amplement par les jointes l'indigne traictement qu'on y faict à sa maison, qui, à mon advis, est bien le plus honteux procedé, et qui sera le plus blasmé de tous ceux que la France a mis en oeuvre durant ceste guerre. Le S.^r Berckhoffer propose des moyens pour un jour tascher de faire dedomager V.A. de ceste perte à l'occasion d'un traicté de paix, où il seroit bien juste, devant tous roix et princes, qu'on insistast au nom de V.A. non seulement sur la reparation de ce present degast, mais principalement aussi de celuy qu'on a faict souffrir à V.A. en sa minorité, en destruisant sans cause, et contre toute justice, les beaux ouvrages qui avoyent consté à M. le Prince Maurice pres de 400000 francs, sans que personne fust en droit de l'empescher de batir ce qu'il vouloit dans sa maison et sa souveraineté. Pour le ravage d'aujourd huy le seul sot de procureur du comte d'Auvergne en est la cause, s'estant amusé à la vanité de penser commander au chasteau, qu'il void maintenant se rendre infructueux, pendant qu'il a mis son maistre dans le danger d'une facheuse represaille, en perdant les beaux avantages qu'on luy a tant offert de percevoir reglement par quartiers et dans Paris tout le revenu de la principauté. En effect, quand je voy arriver ces indignitez à V.A., je ne sçay si on pourra

1) Kopie van andere hand.

[p. 342]

s'empescher d'en faire veoir quelque ressentiment de pareille rudesse sur le chasteau de Heel, vis à vis de Crevecoeur, qui est audit comte d'Auvergne, et que le monde seroit bien estonné de veoir l'eschapper belle, apres l'infame ruine d'une maison innocente d'Orange. - J'ay encor d'autres articles que le Bureau d'Orange nous a subministrez pour les interests de V.A. à mouvoir dans une negociation de paix, mais je crains que nous aurons encor plus de loisir pour y penser que nous ne voudrions. Au traicté de Munster cependant il a esté plus obmis et negligé qu'il ne falloit, et encor ce qu'on y a obtenu si mal executé que nous le voyons. A la Haye, ce 22^e Dec. 1673.