Briefwisseling. Deel 6: 1663-1687

6240. Aan H. de Lionne. (H.A.)

C'est icy une des lettres qu'il a pleu au Roy de faire escrire à Orange à mon instance. Depuis ce temps là on y a tant vilipendé cet ordre, tant faict d'affronts au Prince, et tant de violences à ses subjects que ce n'est que peu de chose ce que S.M. a eu la bonté de vous en entendre lire dans ma grande lettre²⁾. Puis donc qu'il s'agit de faire encor autre depesche sur le mesme subject, je vous supplie tres-humblement, Monsieur, qu'elle puisse estre ampliée à l'avenant de ce que les insolences ont accreu, et qu'au nom de Dieu S.A. ne puisse veoir continuer la saisie de ses revenus en faveur d'un officier qui doibt encor luy venir rendre ses comptes. Ce mauvais homme a trouvé moyen de faire croire icy, que les faussetez impertinentes dont il a rempli un blanc seing de la Princesse Royale sont conformes à ses intentions, et cependant le secretaire de S.A. encor en vie³⁾ produit de ses lettres posterieures de quelques moiz

2) No. 6236.

3) Nl. Ondart; zie V, blz. 78.

[p. 51]

audit blanc seing qui en detruisent absolument le contenu; et cela ne laisse pas de nous couster la saisie de vingt mil livres, qui en sont dix au delà de ce que le commandeur de Gaut mesme a avoué d'en avoir faict saisir. Apres tout, Monsieur, S.A. doibt elle souffrir cecy a non domino? Je m'asseure que le Roy, qui est si juste, estant bien informé du faict, ne voudra jamais proteger un mauvais serviteur contre un bon maistre, qui encor luy tend les bras, et luy promet non seulement de la justice, mais mesme de la faveur, s'il s'en vent rendre digne. Pour moy, Monsieur, vous voyez que souhaittant de faire tout comprendre en mesme ordre, je butte à vous delivrer de mes importunitez. Obligez moy, s'il vous plaist, de faire en sorte que c'en puisse estre icy une de mes dernieres, et celuy qui vous l'ose donner, tousjours .... 1 Avril 64.

J'espere que vous aurez la bonté de m'accorder aussi une copie de ce qui s'escrit presentement et de regler le tout en sorte que rien ne se fasse an prejudice de l'autorité de S.A. en sa principauté.