6030. Aan M. le Tellier. (H.A.)
Le Sieur de Beauregard ayant bien veu que jamais la Tutele de Monseigneur le Prince son Maistre n'aggreeroit qu'autre qu'elle et ceux du Conseil de S.A. prinst connoissance de l'administration de son domaine, pour me faire veoir comme il desiste de son dessein a envoyé icy la lettre de M. de Bezons toute close, sans l'avoir voulu ouvrir luy mesme. Par où ne nous restant autre embaras que celuy d'un acte de M. le commandeur de Gaut, que par cy devant, Monsieur, vous avez voulu recevoir de ma main, et improuver comme contraire aux ordres que de par le Roy vous aviez prins la peine d'envoyer audit Sieur commandeur, je vous supplie tres-humblement que pour avoir de quoy m'opposer à la protestation de nos fermiers cy jointe, il vous plaise de presenter ce petit memoire à S.M., afin qu'en suitte les obstacles que nous donne encor ledit acte soyent levez, et que durant ceste detention du bien de S.A., qui a desjà tant causé d'inconveniens et comme j'espere, ne sera plus guere longue, elle puisse au moins jouïr et disposer avec liberté de ses revenus, comme à ma derniere audience le Roy m'a faict l'honneur de m'asseurer que telle est absolument son intention. La crainte que j'ay de vous importuner par trop de ma presence me porte à vous faire plustost ceste adresse par escrit que de bouche. J'espere que vous le prendrez ainsi et me conserverez tousjours l'honneur de me croire ..... Paris, 20 Feb. 1663.
Auteursrecht onbekend