Briefwisseling. Deel 5: 1649-1663

5895. Aan du Fresne¹⁾. (H.A.)

Il me souvient qu'à S.^t Germain vous me fistes la faveur de m'ouvrir quelques moyens par lesquels vous estimiez que M. le Prince Guillaume de Nassau pourroit s'acheminer au but de sa juste pretension²⁾. Mais c'est tout ce que ma meschante memoire m'en represente. Je vous supplie tres humblement d'avoir encor la bonté de m'enseigner la route que vous jugez qu'il faille tenir en cest' affaire. Ce brave Seigneur regrette fort que les offices que Mess.^rs nos ambassadeurs ont tasché de luy rendre se trouvent tous infructueux, et s'estonne de ce qu'on faict ce grand tort à la generosité du Roy de l'induire à hesiter sur un rembourssement si raisonnable. En suitte il ne cesse de me presser, de pousser à la mesme rouë, durant le sejour que je doibs faire icy. Aussi luy rendray-je bon compte, Monsieur, de ce qu'il vous aura pleu d'y cooperer, et comme il est genereux au dernier point, je puis bien vous asseurer que le succes de son affaire sera tousjours accompagné de ressentiments et de reconnoissances legitimes.

Je me suis donné l'honneur d'escrire desja quelques fois à Monsieur le comte de Brienne³⁾, et n'en entens non plus parler, que s'il y avoit rupture manifeste de l'amitié dont il a voulu m'honorer; vous pourriez fort m'obliger, Monsieur, en prenant la peine de scavoir par occasion, en quoy je puis avoir donné subject de me veoir si mal traicté, et en mesme temps de me dire, s'il n'a esté faict mention de ma poursuitte au Roy, depuis que je suis hors dela, et s'il n'y a apparence que S.M. se relasche d'un article sur lequel tous les propres subjects mesmes s'estonnent de la veoir insister. Je ne scay plus de quoy pretexer la chose à ceux qui ont soin de s'en enquerir, et ont autant d'affection pour l'honneur du Roy, que pour les interests du Prince orphelin qui souffre. Je vous demande pardon de tant d'importunité, et vous supplie de me croire ..... A Paris, 22 Aoust 1662.

1) Kopie van andere hand. - Du Fresne was commies van den graaf de Brienne; zie No. 5869.

2) Nl. Willem Frederik van Nassau, stadhouder van Friesland; zie No. 5780 en 5860.

3) No. 5879, 5880 a en b.