Briefwisseling. Deel 5: 1649-1663

5558. J. van der Burgh²⁾. (L.B.)

La lettre qu'il vous a pleu me faire l'honneur de m'escrire le 18^e de ce mois, m'a extremement resjouy, puisqu'elle m'a faict esperer que nous apprendrons bientost vostre entiere convalescence. Le remerciement que vous me faictes de mes devoirs est une civilité supererogatoire, au regard d'un homme qui vous est totalement acquis. Je ne manqueray de faire voz compliments aux amis qui ont voulu avoir l'honneur d'accompagner de leurs vers l'excellent thresor de vos poësies flamendes. Pour le S.^r Decker³⁾, je ne le cognoy que par quelques vers moreaulx de sa façon et par l'addresse de Mons.^r Vondel; à ce que je puis juger de sa modestie, vous ne sçauriez pecher contre la distributive en plaçant son epigramme quelque part que ce soit. La dame, qui s'est évertuée de couronner voz oeuvres de ses productions, c'est la grosse dondon d'Amsterdam; elle est fille d'un marchand de plomb, demeurant au Warmoestraet, et se mesle de la peinture, sculpture, et de plusieurs autres gentillesses⁴⁾. Pour vostre gros Coppenolle⁵⁾, je prendray au plustost occasion de luy faire souvenir de son devoir et de sa promesse. La gentille lettre que Mons.^r vostre filz m'a faicte le 14^e de ce mois, m'a esté livrée à heure deuë; je luy en rends graces et vous ay une obligation particuliere, de ce que pendant vostre maladie vous vous estes servy d'un si noble secretaire. A Amsterdan, ce 23^e Novemb. 1657.

2) Uitgegeven door Van Vloten, Dietsche Warande, V, 1860, blz. 253.

3) Nl. Jeremias de Decker, de Dortsche dichter († 1666); hij schreef een lofdicht voor de Korenbloemen.

4) Bedoeld is Catharina Questiers (1637-1669), dichteres en vertaalster van tooneelstukken uit het Spaansch. Ook zij schreef een lofdicht voor de Korenbloemen.

5) Zie blz. 278.