Briefwisseling. Deel 4: 1644-1649
(1915)–Constantijn Huygens–
Auteursrecht onbekend
[pagina 490]
| |
4854. Aan M. MersenneGa naar voetnoot1).*J'ay veu aveq desplaisir et non sans apprehension la main empruntée qui m'a escrit vostre derniere lettre. Dieu, j'espere, vous aura encor remis de ce mal, qui est de acutis, et ne peut estre negligé. Mon Archimede est à la Haye, et j'en suis dehors depuis quinze jours, desquels une partie a esté employée aux solemnitez du baptesme de nostre jeusne Electeur de Brandenbourg à CleveGa naar voetnoot2). Ce que j'ay à vous rapporter de ce voyage là, c'est que j'y ay eu tout mon saoul de tres-excellente musique instrumentale, que possede cet Electeur, de toutes façons, et nommément de violes de gambe incomparables, de harpes d'Yrlande et autres, de dolciansGa naar voetnoot3), cornets, positifsGa naar voetnoot4) et autres pieces de tresbon concert, toutes maniées en grande perfection; pensez si je m'y suis trouvé simia inter nuces. Au moins, j'ay bien exercé ces Messieurs, qui sont tousjours de bonne sorte non mechanique, et nous sommes devenus grands amis, quand je les ay faict taster de quelques mienes compositions, qui ne sont jamais parvenues à vostre cognoissance, ny ne la meritent pas. Le S.r de la BarreGa naar voetnoot5) me tesmoigne de l'inclination à dedier le service de sa fille et fils à nos Altesses. Si une consideration ne me retenoit, je travailleroy à ce marché, et verray pourtant ce qu'il y aura moyen d'y faire à la Haye, que nous sommes taillez de ne reveoir pas de cinq ou six sepmaines, ayans à roder encor par d'autres provinces esloignées plus que celle cy. Ledit Sieur la Barre m'escrit d'un certain clavier d'espinette mouvant, qu'il a inventé, à faire changer de ton; si vous sçavez comment cela se prattique, je vous en demande la science, mais soyez bien gueri et de loysir, avant que de vous y amuser, et me croyez passionnement ..... A Nimmeghe, quod est verum Taciti oppidum Batavorum, en despit de plusieurs pedans qui s'y sont mespris. 14 Aoust 1648. |
|