Briefwisseling. Deel 4: 1644-1649

[p. 389]

4545. Chr. Otterus¹⁾.

Libro expetito, tandemque conquisito, Musam illi meam, novitate saltem commendatam, comitem ad te dedi. Hanc sane sub diversarum occupationum cumulo ut nuper primum ortam, ita paucissimo usu minus excultam, conspectum viri tanti ingenij, viri ut in omni literarum genere, ita in hoc eminenter versatissimi subterfugere potius, quam acerrimo eiusdem judicio sese committere decuisset. Rudidatem enim sui aliquam ut ipsa satis agnoscit, ita peregrinum vulgo receptum et a cultu Teutonico prorsus alienum, praegnantes ob causas, velamen rejecit. Pulchritudinem in membrorum concinna aptaque proportione ac dispositione magis, quam in sola earundem affectata teneritate, suppressisque naevis, fucata apparentia consistere existimans, incognita fere omnibus hisce in locis, simplici ad te cultu, invitata praesertim, procedere haud erubuit. A nullo enim ut magis benigne susceptam, sincere aestimatam, aequiusque habitam, ita quandoque splendidius excultam, publice celebratam aevoque consecratam se fore confisa est. Plura de hoc coram; brevi enim filium T.A. Leidae invisurus, ad te quoque pergere decrevi. Interea optarem, me proceribus quibusdam, eruditionis nomine, eruditorumque aestimatione, hoc in loco, claris, tua commendatione innotescere. Fructus inde redundantes in tuos, tibique addictos, se derivaturum promittit ..... Amstelodami, Id. (13) Febr. 1647.

Responsorias, si ita visum fuerit, ad Ludovicum Elsevirium²⁾ destinare licebit, Amstelodamum.

1) Het Hs. behoorde tot de collectie van Jhr. Coenen van 's Gravesloot. - Zie No. 4519.

2) Lodewijk Elzevier (1604-1670) was de stichter der uitgeversfirma te Amsterdam (1638).