4144. Aan prinses Amalia van Oranje. (H.A.)*
Monsieur de Brederode s'estant acheminé depuis hier au matin vers le quartier destiné pour ses trouppes, du costé du sudwest de la ville, a continuellement esté apres à prendre les forts des digues de là autour, qui sont en grand nombre, et se tienent comme une chaisne. Entre autres ceste nuict le fort de Nassau s'est rendu, puis celuy de S.t Anne qui le suit. Ferdinand, pourveu de trois pieces de canon, se defend encor en grande colere. Mais à la fin tout cela pliera. L'enemi mesmes a mis le feu en celuy de Langerbrugge pres de Gant, et a faict saulter une autre fois celuy de la Misere à Waechbeke. Celuy du Sandbergh icy pres est aussi abandonné, et donne tant plus libre entrée à nos bateaux de vivandiers, qui arrivent peu à peu. Ceste ville nous faict esperer de grands avantages aux approches, y ayant tel endroict, où soubs la faveur des digues on l'approche à couvert jusques à la portée du pistolet, marque de la grande negligence de ces gens icy, et du peu d'estat qu'ils ont faict qu'on vinst jamais les prendre par derriere. On dit que Beck auroit mené, ou meneroit ceste nuict du monde à Dendermonde. Pour icy, il viendra tousjours tard, car voyci nostre circonvallation comme achevée. Au camp pres de Hulst, le 6e Octob. 1645.
Auteursrecht onbekend