Briefwisseling. Deel 4: 1644-1649

3847. W. van Liere⁴⁾. (H.A.)

Je suis en un pays ou les chapeaulx n'ont point esté faicts pour couvrir les testes, et ou l'on devient tout bossu a force de faire de reverences. Ce que je dis pour ce que depuis quinze jours je ne fay que de faire et de reçevoir des visites, et des compliments. J'ay prins le petit dueil comme les autres ambassadeurs pour tesmoigner la part que nous prenons au ressentiment que nos superieurs ont au deces de la Royne d'Espagne⁵⁾, mais Dieu vueille que soubs ce masque il ne nous soit donné suject d'un vray dueil, ut de corde doleamus et sine teste. L'abbé de Dole dit lundy passé a l'eglise de Nostre Dame que la Royne Regente avoit causé la mort a la Royne d'Espagne par la forte guerre qu'elle avoit faicte au Roy son mary, et que ladite Royne avoit anime ledit Roy de la poursuivre a outrance, pour monstrer qu'elle portoit plus grande affection a ses enfans qu'a ceux de son frere, de mesme que la Royne Regente, bien qu'Espagnole, tesmoignoit avoir le coeur françois. Vous voyez, Monsieur, que les langues des predicateurs prennent liberté plus grande maintenant qu'elle n'en avoient du temps du feu Cardinal. Je ne veux pas vous entretenir des querelles de ce climat, que le mareschal de Gassion⁶⁾ a faict appeller le duc d'Elbeuf⁷⁾ en duel, ny que le duc de Meclebourg⁸⁾ feit aussi hier donner un cartel au comte de Rouveau⁹⁾. J'ayme mieulx que d'autres qui ont trop de loisir vous en entretiennent. Pour moy, ce me sera assez que me croyiez ..... Le 10^e Decemb. 1644, a Paris.

4) Zie I, blz. 6.

5) Elisabeth van Frankrijk (geb. 1602), dochter van Hendrik IV en Maria de Medicis, was de eerste echtgenoote van Philips IV (1605-1665), sedert 1622 Koning van Spanje. Zij stierf 6 Oct. 1644.

6) Zie II, blz. 454.

7) Zie I, blz. 390.

8) Waarschijnlijk een zoon van Adolf Frederik I (1588-1658), hertog van Mecklenburg-Schwerin, of van Johan Albrecht II, hertog van Mecklenburg-Güstrow.

9) De naam is niet duidelijk geschreven. Een graaf de Rouveau is onbekend.