Briefwisseling. Deel 4: 1644-1649

3639. Aan prinses Amalia van Oranje. (H.A.)*

Je fay suivre ce mot de près à une mauvaise lettre, mais de bonne nouvelle, que je fus hier obligé d'escrire à V.A. du quartier de Selzaten, dans un lieu, où ceux qui me virent, ne sçavoyent s'ils me devoyent railler, ou avoir pitié de moy. Revenu donq au viel quartier, que S.A. se disposant au siege du Sass, a choysi pour le plus important, je repete aveq plus de commodité, que dans ceste glorieuse action d'hier et soldats et officiers et volontaires ont rendu une si digne preuve de leur valeur et affection au service de l'Estat et de S.A. qu'il ne se peut rien desirer davantage, et de l'air seulement que tout le monde marchoit à ceste execution les deux nuicts consecutives l'on pouvoit juger ce qui se devoit attendre de gens si bien disposées à faire en soldats d'honneur. - J'avoy obmis au recit, qu'apres le pont mis, et le Sandfort prins par Mons.^r Puchler, il avoit envoyé quelque monde à entreprendre le plus proche du costé de Selzaten, soubs le capitaine Viry²⁾, et que cestuyci se trouvant foible contre 200 hommes du comte de Meghen qui luy firent teste en un chemin, M. Arskin³⁾ y fut envoyé aveq son regiment, où encor il y eut combat de main, jusques à ce que ces gens estants chassez et battus, ce prochain fort fut aussi enlevé, où un jeune fils dudit coronel Arskin fit des merveilles et mena des prisonniers d'importance à S.A. - Une autre remarque considerable est, que sur les instances que le comte de Meghen, commandant en ce quartier, avoit faictes au comte d'Ysenburgh⁴⁾, au moyen des advis qu'il eut de nostre marche, cestuyci luy avoit envoyé le regiment de Don Stefano de Gamarra, qui justement survint hier sur l'heure que nous donnames, et ensuitte se destournant par des chemins d'au dedans du païs, fit en sorte qu'il entra dans le Sass ceste mesme nuict. De maniere qu'aveq ce qu'il y a de recreuë du costé d'Anvers, dont j'ay parlé en ma derniere, de par le comte de Meghen, et de par quatre ou cinq compagnies de garnison ordinaire l'on peut assez supputer, qu'il ne s'en fault gueres qu'il n'y ayt de 15 a 17 eens hommes en ceste place, de laquelle pourtant aveq l'ayde de Dieu, nous viendrons à bout,

2) Zie blz. 13.

3) James Arskin († 1655) was sedert 1644 kolonel. (Meded. van den Heer Wakker.)

4) Zie Il, blz. 193.

[p. 16]

si les François sont soigneux de bien recognoistre d'effect les bons offices que S.A. leur a rendu jusques ores, et que journellement ils advouent assez en lettres et paroles de bouche. Pour tousjours presser S.A. - dans la difficulté qui se rencontre tousjours au siege de Graveline - le comte de Marcheville¹⁾ arriva icy - je dis à Selzate - hier au soir de la part de M. le duq d'Orleans, et s'en retourna aujourdhuy tesmoing oculaire de ce qu'il venoit nous prescher. Ce mesme soir il fut envoyé quatre regimens à entreprendre le fort S^t. Estienne vers le Sass, mais cestuyci se sachant asseuré d'un fossé bon en non guayable, se laissa et tirer des salves de mousquet, et des petites volées de canon, sans s'esmouvoir autrement qu'à bien bravement respondre et de saluer de mousquet et de canonades, et à nous blesser bon nombre de gens, sans que pour ce coup il fust possible de l'emporter. Cy apres, comme il faudra l'avoir, on faict estat, qu'un bon pont de jonqs, et quelque multitude de grenades le feront promptement resoudre à ce qu'il nous refuse jusques ores. Cependant nostre circonvallation, tracée dès hier au soir, se va entreprendre à coups de pesle aujourdhuy, et y a desjà deux quartiers arrestez outre celuy de S.A., dans l'un desquels commandera M. le comte Guillaume²⁾, qui est entre icy et Selsaten, et dans l'autre M. de Brederode vers Selzaten mesme. Pour nous accroistre aussi en nombre, S.A. vient d'envoyer quinze compagnies d'infanterie de celles qui sont avec le comte Henry à Nimmeghe et Grave, et, si mon astrologie ne me trompe, je prevoy que par cest' affaire il y aura encor de la bourgeoisie obligée à garder les villes, dont nous aurons besoing de tirer des gens. Au camp à Assenede, le 28^e de Juillet 1644.

1) Hij wordt ook genoemd III, blz. 497, en boven, blz. 7.

2) Nl. Willem Frederik, stadhouder van Friesland.