Briefwisseling. Deel 3: 1640-1644

2721. Aan graaf Hendrik van Nassau. (H.A.)aant.

C'est à mon tres-grand regret que je vous voy embarassé en un affaire que vous ne sçauriez mieux nommer que malheureux et auquel je suis si peu capable de vous servir. J'apperçois que S.A. le prend assez à coeur, quoyque les expressions qu'il luy a pleu m'en faire jusques à present ne sont autres, sinon qu'on s'en fust bien passé. Mais cela aussi doibt passer, comme toutes choses de ce monde. Cependant S.A. escrit au Conseil d'Estat de vous continuer voz gardes, jusques à ce qu'elle advisera comment disposer de l'affaire. En cela il fault s'armer d'un peu de patience, et n'y a, pour tout conseil qu'on vous puisse donner, que de se soubsmettre aveq humilité et respect aux intentions de S.A., comme je sçay bien, Monseig.^r, que les vostres ne tendent pas ailleurs. Si cependant vous trouviez à propos de passer quelques heures à mettre exactement par escrit toute l'histoire de vostre procedé depuis le commencement jusqu'au bout, afin de l'envoyer par avance à S.A. et la luy laisser digerer, à l'encontre des mauvaises impressions, qu'il ne se peut qu'il

[p. 174]

ne reçoive de l'autre costé, où il y a des gens chaudement animées, il me semble que la peine n'en seroit pas perdue, soit que cest escrit fust adressé directement à S.A., ou bien par l'entremise de Madame, ou de tel autre que vous pourriez trouver à propos. Mais ce sont de mes songes, Monseigneur; vous en userez selon vostre plus grande prudence, et cependent m'obligerez de faire estat, que tant en ceste fascheuse occurrence qu'en toute autre qui puisse concerner vostre service je suis à vous et m'employeray de passion - comme j'ay desjà faict sur ce subject - à vous tesmoigner par effect, à combien je repute l'honneur d'estre creu ..... Buren, le 28^e de May 1641.