Briefwisseling. Deel 3: 1640-1644

2584. Aan prinses Amalia van Oranje. (H.A.)*

Selon ma derniere, je ne debvois importuner V.A. de la lecture de mes lettres inutiles, sans sçavoir au vray le jour que S.A. determineroit pour son retour, mais ce messager s'en retournant aveq de la response à Messieurs les

[p. 125]

Estats Generaulx, et greffier Musch, auxquels S.A. dit avoir resolu, de partir dans quatre ou cinq jours d'icy, il m'a semblé que V.A. auroit aggreable que je l'entretinsse de cest advis general, jusques à ce qu'un plus determiné arrive. - Cependant la gelée reglera un peu ceste deliberation, une nuict ayant desjà tant faict de glace icy, que dans les prairies inondeés les enfants ont courru dessùs dès aujourdhuy, et semble que le temps serein et froid qu'il faict, n'en promet pas moins pour la nuict qui vient. Forte gelée, ou nulle nous seroyent les plus propres, mais les entredeux donneroyent d'extremes incommoditez.

S.A. fut hier prendre possession de sa place au college des deputez de ceste province. Apresdiner elle fit le tour des beaux remparts de la ville à cheval, nonobstant un extreme froid, qui amenoit une petite fascheuse neige, par un grand vent. Car, graces à Dieu, la disposition de S.A. paroist icy à toute espreuve. Ce matin S.A. environnée de grand monde, est allée au presche de la grande Eglise et y a entendu, aveq beaucoup de satisfaction, la belle orgue, qui y est, accompagner le chant du peuple, aveq tant de gravité et majesté, que c'est une merveille combien tout le monde s'en trouve edifié. Cela m'anime davantage à faire imprimer cest hiver ce que j'ay escrit sur ceste matiere¹⁾, ne pouvant plus souffrir, que noz florissantes eglises demeurent frustrées d'une si belle ayde à leur ordre et devotion. Et S.A. asseure, cela s' introduisant, elle seroit contente, de faire remettre une orgue dans la chapelle de la cour. - M. le comte d'Emden donne presentement à soupper à Monseigneur le Prince Guillaume et la pluspart des seigneurs qui sont icy, ayant aujourdhuy disné aveq Son Alt^e. A Groninghe, le 25^e de Novemb. 1640.

1) Het werkje Ghebruyk en onghebruyk van 't orgel in de kercken der Vereenighde Nederlanden, dat in 1641 te Leiden is uitgegeven.