Briefwisseling. Deel 2: 1634-1639

1856. Aan prinses Amalia van Oranje. (H.A.)*

Ma derniere fut d'hier, mais depeschée apres minuict, d'où il sera arrivé, que Monsieur de Brederode y en aura adjousté une de plus fraische date en apparence, mais non plus fraische que d'une heure ou deux.

Trois heures apres, à sçavoir aujourdhuy d'assez bon matin, nous avons esté esveillez d'une nouvelle, portant que Monsieur le comte Guillaume s'estoit soudainement resolu à la retraicte²⁾, qui commença hier au soir environ les huit heures, et fut executée aveq tant de desordre, que l'enemy s'en prevalant, en avoit tiré d'assez grands avantages, en pressant les derniers en sorte que le canon qu'on y avoit, les chevaux des cavaliers et trop d'honestes gens y ont payé l'escot. Le vent est si contraire jusques à present apres midi, qu'on n'en peut apprendre toutes les particularitez. Seulement sçait on, que M. le comte Guillaume se trouve dans Lillo, et quelques autres officiers dans Liefkenshoeck et ailleurs, où il arrive continuellement grande quantité de gens sauvez, qui à pied, qui dans des bateaux ou chalouppes. - Monsieur de Brede-

2) De bekende terugtocht van Calloo.

[p. 368]

rode et moy avions resolu d'en attendre plus de circonstance, avant que depescher personne vers Buren, mais comme S.A. me commande de faire passer promptement l'enclose, M. de Brederode a voulu que ce fust par ce sien lacquais. Dans demain nous en sçaurons plus, et V.A. en sera servie, à mon regret, qui voudroye avoir de la matiere plus aggreable à l'entretenir, quoyque, graces à Dieu, il n'y a point de païs du nostre perdu, et les premiers bruicts augmentent tousjours les choses. A Noordgeest, le 22^e de Juin 1638.