Briefwisseling. Deel 2: 1634-1639

1668. Aan prinses Amalia van Oranje. (H.A.)*

Encor ne vient il que des bruicts et rapports differents de Venlo, sans que jusques à present on puisse sçavoir vers où la garnison a esté envoyée, ni autre particularité. Bien vient il des gens qui comptent que quinze ou seize maisons ayant esté embrasées avec quelques granges, la bourgeoisie auroit courru sus au gouverneur, l'auroit voulu massacrer, et choses semblables, mais nulle nouvelle de luy mesme, non plus que s'ils estoyent tous abismez. Et enfin fortes asseurances de ce que Rurmonde est investie, parce qu'un chasseur, qui avoit entreprins d'y porter quelques lettres, s'en revient sans effect, et tesmoigne qu'il est impossible d'y entrer, et au reste, qu'il avoit veu que les nostres tiroyent extremement hors de la ville, et qu'à ce qu'il avoit peu apprendre, la garnison de Venlo avoit esté envoyée à Rhinberck.

Dans noz approches tout va de mesme pied; Mons.^r le comte de Solms y est ceste nuict du costé anglois, et de l'autre le Sieur de Buat²⁾, qui a faict dessein de traverser le chemin couvert, s'il est aucunement possible, et de se loger sur le bord du fossé de la corne, qui n'estant pas large, se pourra combler de fascines. Et cela surmonté, ceste corne s'en trouvera aux aboiz, bien qu'il faille imaginer, qu'ils y ont des mines en provision, car dans le chemin couvert mesme on en a descouvert jusques à deux, mais comme on en est dessùs ses gardes, ces peines s'en vont pour la pluspart perdues. Devant Breda, le 29^e d'Aoust 1637.

2) Zie blz. 281.