Briefwisseling. Deel 2: 1634-1639

1148. C. van der Myle. (H.A.)aant.

‘La femme des bas verds¹⁾ est venu ici pour la seconde fois, comme je croy qu'en aures este adverti d'ailleurs. Son gardien m'a dit qu'il auroit fort recrie et menacé à cause qu'il ne pouvoit parler à elle n'y à ses enfans. Rodrigo n'a jamais escrit à moy, mais sa femme m'ayant este voir m'a dit qu'il recommande ses affaires à vous cognues et que le[s] bas verds fussent bien gardes. Ses lettres à sadite femme estoyent de Bruxelles du 8 de ce mois, ne faisant mention d'aucune autre chose. En suite de ce que je vous ay advise par une de mes susdites, j'ay visite une fois les bas verds sur l'occasion de ses discours de Zeelande, mais le plus remarquable que j'appris de luy concernoit N.V.P. duquel il parloit avec un mauvais accent, et qu'il ne me cognoissoit pas, ny celuy qui m'accompagna. Il fault bien qu'il tienne cela pour regle de mesdire de luy, afin de prevenir ainsi ce qu'on luy voudroit proposer à l'advenir. Depuis il m'a envoye tout son discours par escrit, dont vous aures copie sitost que j'auray le moyen de le pouvoir envoier. J'ay trouve bon de laisser couler quelque espace de temps entre deux devant que de le revoir et luy mettre à l'improviste au devant ce que j'ay receu depuis vostre depart. Du succes vous seres instruit. Je scay vostre soin et sollicitude au regard de tout ce qui concerne directement ou indirectement Monseigneur le Prince, et pourtant ne fay nulle doute ou prenes et faites prendre exacte garde sur toutes sortes de semblables marchants qui, et singulierement en ses²⁾ occurrences, viendroyent pour negotier si fausses et descriees estoffes. Les bas verds seront bien gardes; c'est un marchant de tres mechante mine. De la Haye, ce 17 de Juin 1635.

1) Zie No. 1139.

2) Lees: ces