Briefwisseling. Deel 1: 1608-1634

533. Justinus van Nassau⁴⁾. (B.M.)

J'escris à Son Excellence en faveur de mon fils⁵⁾, la suppliant tres humblement de le tant honorer que de le vouloir surroger en la place de feu le capitaine Daniel, qui est mort vendredi passé à Arnem. Et comme M. le comte Ernest de Nassau desirera, avec la permission de Son Excellence, pourveoir à la lieutenance de la compagnie de cavallerie de laquelle mondict fils a esté cornette quelques années, je la supplie d'avoir souvenance en ceste occasion de luy, et luy tesmoigner le desir qu'il a de le gratiffier en une si juste supplication; en quoy je vous prie affectueusement de vouloir seconder mes tres humbles prieres, et d'en faire souvenir Sadicte Excellence, à celle fin que mondict filz soit preferé à d'autres, qui peut estre solliciteront ceste charge, et qui s'est expressement allé trouver mondict seigneur comte en toutte diligence d'Arnem, pour avoir sa faveur. Je m'en vais estre vieil, et me trouve asses incommodé en ma santé, ce qui me faict desirer de veoir mes deux fils aucunement advancés, devant que mourir, et cela par la faveur de Son Excellence, de laquelle ils sont et demeureront toutte leur vie tres humbles et tres fidelles serviteurs. Je vous recommande donc ceste affaire et de m'y vouloir tesmoigner vostre affection, et vous en auray une grande obligation. Je me recommande bien humblement en vos bonnes graces, comme celuy qui est veritablement ..... A Leyden, ce 29 de Septembre 1630.

4) Uitgegeven door E. van Bruyssel in Compte rendu de la Commission Royale d'Histoire, ou Recueil de ses bulletins, 3^e serie, VI, Bruxelles, 1864, blz. 509.

5) Justinus van Nassau had twee zoons, Willem Maurits en Philips van Nassau.